A multifaceted person

सुनील, तुझे पुष्पगुच्छ पुस्तक वाचले. ललित लेखांचे एक छान, वेगळ्या विश्वात घेऊन जाणारे पुस्तक वाचल्याचे समाधान मिळाले. प्रत्येक लेखामध्ये तुझा सखोल अभ्यास व सूक्ष्म अवलोकन पदोपदी दिसून येते. विषयाची मांडणी मनाला भावते. एका विषयात किती कंगोरे असू शकतात हे तुझ्या लेखातून कळतं.

पत्रास कारण की, धम्मक लाडू, जत्रा - एक अद्भुत रस, पत्ते एक कुटणे, शिक्षण व शिक्षा या लेखांमधून आपल्या बालपणीच्या सुखद आठवणी जागृत होतात व आपण त्या लेखांमध्ये समरस होतो. उत्तरदर्शिका हा लेख वेगळाच आहे. विशेषतः या लेखांमध्ये दूध, मोलकरणीचा खाडा कसा लिहितात हे मी स्वतः अनुभवलेलं आहे. वाचताना खूप मनोरंजन झाले. प्रत्येक लेखाच्या समारोपात जाता जाता एक चांगला संदेश दिला आहे.

या ताणतणावाच्या जीवनात हे पुस्तक वाचल्यावर एक निर्भेळ आनंद नक्की मिळेल. ललित लेखन करणारी माणसे सध्या खूप कमी आहेत. तुझ्याकडून असेच चांगले लेखन घडो ह्या शुभेच्छा व सदिच्छा.

महोदय, दिव्य मराठीच्या पुरवणी मधील आपला “जशी दृष्टी तशी सृष्टी” लेख वाचला तो खूप मनाला भिडला. आपण विषद केलेला जीवनविषयक दृष्टिकोन अत्यंत विचारणीय.

आपण क्षणभर चाचपडत चालणं आणि दृष्टीहीन माणसाचं आयुष्य घालवणं हा विचार देखील अंगावर काटा आणतो. असा दृष्टिकोन समाजासमोर ठेवलात हे कौतुकास्पद.

विषयाचं शीर्षकच इतकं अप्रतिम की ‘सहनशीलतेचा वारसा स्त्रीत्वातूनच’ हे सार पूर्णत्वाने व्यक्त होतं. विषयाची मांडणीही अत्यंत उत्तम आणि हृदयाला भिडणारी आहे. सुनील, तुझ्या लेखनासाठी अभिनंदन शब्दसुद्धा अपुरीच पडतात.

तुझे लिखाण हलके फुलके
परी त्यात दिसे कल्पकता
निर्भेळ कशास म्हणावे
ती वहात असते सरिता!

हास्यानंद दिवाळी अंकात तुझा “खड्ड्यात जा” हा लेख वाचला. साधा खड्डा, पण तू त्यात डोकावून, खणून जे शब्दरुपी माणिक मोती बाहेर काढून सर्वांसमोर मांडलेस त्यास तोड नाही.